《一分鐘煮好 完美水波蛋》

用傳統方法煮水波蛋（poached egg）要用好多功夫同時間，但其實用微波爐嚟煮只要一分鐘咋！只要跟足小貼士，入廚新手都煮到！簡單好味，最適合趕時間出門口嘅返工一族！ 

做法: 

1. 將雞蛋打入一個細碗內。係另一個250毫升嘅飯碗加入大半碗水，再輕力加入雞蛋。 

2. 放入微波爐用預設火力叮20秒，用匙羹輕力攪一攪啲水，以確保雞蛋平均受熱。之後再叮15秒，2秒後再叮5秒，重覆此步驟至蛋白完全變色就可以喇（我用特大雞蛋，共用了20+15+5+5+5秒）。 

3. 倒去水後，加上鹽和黑椒調味就食得啦！ 

小貼士： 

1. 一定要用室溫水，唔可以貪快用熱水。用熱水會增加蛋黃喺微波爐裏面爆開嘅機會。而且碗內嘅水一定要蓋過雞蛋。 

2. 我試過一次過叮50秒，第40秒左右隻雞蛋喺微波爐裏面「噗」一聲咁爆開！所以安全起見，每次叮最多20秒，俾隻雞蛋休息兩秒後又再叮多5秒，咁就每次都無失手喇！

3. 因應每部微波爐嘅唔同火力，和每隻雞蛋嘅新舊大細，每次用嘅時間都有可能有5-10秒左右嘅上落。所以到最後要每5秒再加5秒咁叮，雖然聽落好麻煩，但其實總共都係煮一分鐘姐！ 

4. 比起傳統用水煮嘅方法，用微波爐煮嘅水波蛋嘅蛋黃會較熟而蛋白較滑身。我個人覺得用傳統方法煮嘅好食啲啲，不過要用多好多功夫同時間（>10分鐘），又要用醋又要用保鮮紙。微波爐煮蛋嘅方法至少唔駛洗碗洗煲，掌握好後仲會一定成功煮到添！